Ұлы ойшыл, ағартушы, ақын Абай Құнанбайұлының шығармашылық мұрасын насихаттау мақсатында Ақмола облысының мәдениет басқармасы мен Облыстық халық шығармашылық және мәдени демалыс орталығының ұйымдастыруымен Көкшетау қаласында алғаш рет ашық аспан астында көркемөнерпаздар театралдары бас қосқан «Даналық бастауы – Абай» театрлар фестивалі өтті.
Фестивальге Ақмола облысының аудандары мен қалаларынан халықтық театрлар қатысты.
Әр ұжым өз қалаулары бойынша Абай шығармаларынан үзінді қойылым, Абай туралы сахналық көрініс көрсетіп және Абайдың өлеңдерін оқыды.
Фестиваль қорытындысы бойынша Абай шығармашылығына негізделген ең үздік қойылым үшін «Үздік қойылым» аталымы бойынша «Шежіре» дарамалық театры, жетекшісі Дәулет Мұхтархан (Біржан сал ауданы), Абай Құнанбайұлының образын сахнада шеберлікпен бейнелеген актер «Абай бейнесін үздік сомдаған актер» аталымы бойынша Еламан Мұратханов (Біржан сал ауданы), қойылымды мазмұнды, көркемдік және сахналық жағынан кәсіби деңгейде ұсынған режиссер «Үздік режиссура» аталымы бойынша «Ақмол» театры, жетекшісі Гүлжан Абидибаева (Целиноград ауданы), Ақынның поэзиясын, қара сөздерін немесе әндерін сахналық қойылыммен үйлестірген ұжым «Абай шығармаларын шебер қолданғаны үшін» аталымы бойынша «АрАРТе» театры, жетекшісі Берікбай Шұғайынұлы (Степногорск қаласы), қазақ халқының тұрмысы мен дәстүрін, рухани құндылықтарын көркем жеткізген ұжым «Ұлттық болмысты көркем жеткізгені үшін» аталымы бойынша Қалимұса, Құсайынов атындағы халық театры, жетекшісі Төрежан Бесембеков (Қорғалжы ауданы), Абай мұрасын сахнада көркем жеткізуде ерекше көзге түскен жас талант «Талантты жас актер» аталымы – Боранбай Ерәли (Целиноград ауданы) жеңімпаз атанды.
Қатысушылар ұйымдастыру комитетінің дипломдарымен марапатталады.