Бурабайдың баурайы, Құлагердей күмбірлеген сөз өнерінің ордасына айналды. Қазақтың ұлы ойшылы, кемеңгер ақын Абай Құнанбайұлының 180 жылдық мерейтойына орай Бурабай ауданында өткен Өңірлік айтыс – ел рухын көтерген, ұлттық өнерді ұлықтаған айтулы шара болды.
Айтыс Бурабай ауданының әкімі Арай Садыковтың қолдауымен жоғары деңгейде ұйымдастырылып, көрерменге шын мәнінде өнер мен руханияттың мерекесін сыйлады. Екі күнге созылған жыр бәйгесіне еліміздің әр өңірінен 10 айтыскер жиналды:
Мұқанбет Қоңқай (Көкшетау), Салтанат Өтелбаева (Қостанай), Ерлан Дәулет (Ақмола), Батырлан Сағынтаев (Арқалық), Тоба Өтепбаев (Астана), Жаңылжан Жолдымұрат (Ақмола), Екпін Сәбетхан (Зеренді), Нұрболат Серікұлы (Алматы облысы), Берденбек Мырзат (СҚО), Сәттібек Серікболат (Ерейментау).
Айтыстың тізгінін – айтыскер ақын, Қазақстан Жазушылар және Журналистер одағының мүшесі, Ақмола облыстық тарихи-өлкетану музейінің директоры Құдайберлі Мырзабек ұстады.
Қазылар алқасы – сөз өнерінің майталмандары:
- Арман Бердалин – халықаралық, республикалық айтыстардың бірнеше дүркін жеңімпазы;
- Байқал Байәділов – Халықаралық жазушылар одағының мүшесі, Қазақстанның құрметті журналисі, “Егемен Қазақстан” газетінің тілшісі;
- Бақыт Сымағұлов – жазушы, Қ.Р. Журналистер одағының Ақмола облыстық филиалының төрағасы, “Ел бірлігі” қоғамдық бірлестігінің төрағасы.
Ақындар сахна төрінде Абайдың мәңгілік мұрасын дәріптеп, ел бірлігі, жердің киесі, тіл мен ділдің тұтастығы жайлы өрнекті ойларын өлеңмен өрді. Көрермен ықыласы мен қошеметі айтыстың әр жұбына ерекше шабыт сыйлады.
Жеңімпаздар мен жүлдегерлер:
Гран-при – 500 000 тг – Батырлан Сағынтаев (Арқалық)
I орын – 400 000 тг – Мұқанбет Қоңқай (Көкшетау)
II орын – 300 000 тг – Ерлан Дәулет (Ақмола)
III орын – 200 000 тг – Сәттібек Серікболат (Ерейментау)
III орын – 200 000 тг – Салтанат Өтелбаева (Қостанай)
Айтысқа қатысып, көрермен ықыласына бөленген қалған ақындар – Тоба Өтепбаев (Астана), Жаңылжан Жолдымұрат (Ақмола), Екпін Сәбетхан (Зеренді), Нұрболат Серікұлы (Алматы облысы), Берденбек Мырзат (СҚО) – әрқайсысы 100 000 тг көлемінде марапатталды.
Бұл жыр додасы – тек сөз сайысы емес, Абай рухын асқақтатқан, ұлттық өнердің қадірін танытқан үлкен рухани жиын болды. Көркем сөз бен терең ойдың, ұлт рухы мен өнердің тоғысқан ордасы – Бурабайда өткен айтыс, қазақ мәдениетінің алтын қазынасына қосылған айрықша белес болып қалды.