2025 жылдың 2 шілдесінде Көкшетау қаласының Әдебиет және өнер музейінде Ұлттық Домбыра күнін мерекелеу аясында халық композиторы, күйші Дәулеткерей Шығайұлының 205 жылдығына және күйші-композитор, домбырашы Тәттімбет Қазанғапұлының 210 жылдығына арналған «Күмбірле, домбыра!» облыстық күйшілер байқауы өтті.
Облыстық халық шығармашылық және мәдени демалыс орталығының ұйымдастыруымен өткен байқауға Үкілі Ыбырай атындағы Ақмола облыстық филармониясы К.Күмісбеков атындағы қазақ халық аспаптар оркестрінің дирижері, «Мәдениет саласының үздігі» төсбелгісінің иегері Руслан Қойшыбаев, Біржан сал атындағы музыкалық колледжінің оқытушылары – республикалық байқаулардың жеңімпаздары Саят Бабаев пен Бауыржан Балтин қазылық етті.
Екі кезеңнен тұратын байқауға Атбасар, Біржан сал, Шортанды, Жақсы, Қорғалжын аудандары мен Көкшетау қаласынан 7 өнерпаз қатысып, қазылар алқасының назарына қазақтың дарынды күйші композиторлары Дәулеткерей Шығайұлы мен Тәттімбет Қазанғапұлының туындыларын ұсынды.
Байқау қорытындысы бойынша жүлделі бірінші орынға Қорғалжын ауданынан келген Нұрболат Сахы ие болды. Екінші орынды Көкшетау қаласынан Өмірбек Мадина иеленді. Жүлделі үшінші орынды Жақсы ауданынан келген Қолғанат Рахметуллин мен Біржан сал ауданынан Әнәс Иманғали қанжығаларына байлады.
Байқау жеңімпаздары мен қатысушылары диплом және ақшалай сертификаттармен марапатталды.